योजना निर्माणमा केन्द्र सरकारको मानसिकता छुद्र छ Sarathikhabar मानबहादुर जीसी दुई वर्षदेखि पोखरा महानगरपालिका प्रमुखको जिम्मेवारीमा छन् । दक्ष कर्मचारी र कानुनको अभावमा जनअपेक्षाअनुसार काम हुन नसकेको चौतर्फी गुनासो छ । स्मार्ट सिटीको एजेन्डाले निर्वाचन जितेका जीसीलाई यसकाे कार्यान्वयन ‘फलामको चिउरा’ बन्न सक्छ । यति हुँदाहुँदै पनि पोखरामा केही राम्रा काम पनि भएका छन् । दुई वर्षमा महानगरले के गर्याे भन्ने विषयमा केन्द्रित रहेर जीसीसँग गरिएको कुराकानीः पोखरा महानगरपालिकाको प्रमुखका रूपमा नेतृत्व सम्हालेको दुई वर्षमा गर्व गर्नलायक काम के गर्नुभयो ? हामी निर्वाचित भएर आएपछि संघीय संरचनाअन्तर्गतका तीन तहका सरकारको कार्यक्षेत्र विभाजनपछि आवश्यक ऐन, कानुन निर्माणमा लामो समय बितेको छ । यस अवधिमा कानुन निर्माण नभएका कारण हामीले चाहेर पनि जनतासामु व्यक्त गरेका प्रतिबद्धताअनुरूप कार्य गर्न सकेनौं । स्थानीय तहले आफ्नै कानुन निर्माण गर्नुपर्ने व्यवस्थाअनुसार संघीय सरकारबाट समयमै कानुन निर्माण गर्न सक्ने दक्ष कर्मचारीको व्यवस्था नगरेका कारण केही अन्योलमा समय बित्यो । हामीले बनाउनुपर्ने ३ सय २५ वटा ऐन, कानुनमध्ये झन्डै ७० वटा कानुन निर्माण गरी स्थानीय राजपत्रमा प्रकाशन गरिसकेका छौं । पहिलो वर्ष कानुन कसरी बनाउने भनेर अलमलमै बित्यो । यस अवधिमा हामीले महानगरका ३३ वटै वडामा अधिकारहरू प्रत्यायोजन गरेका छाैं । महानगरका ३३ वटै वडामा सफ्टवेयर र इन्टरनेट सेवा पुर्याएर जनतालाई सेवा दिइरहेका छाैं । महानगरले पूर्वाधार निमार्णलाई विशेष जोड दिएको छ । गत आर्थिक वर्षमा सातवटा वडा कार्यालय भवन निर्माण गरेका छाैं । यस्तै, ३ विद्यालय भवन, चालू वर्षमा ८ वटा वडा कार्यालय भवन निर्माण गर्ने र नगरका व्यस्त आधा दर्जन चोकको आइल्यान्डलाई घटाई ट्राफिक व्यवस्थापनमा सहज बनाउनेजस्ता महत्त्वपूर्ण काम गरिसकेका छाैं । पोखराका विभिन्न स्थानहरूलाई सौन्दर्यीकरण गर्दै करिब एक दर्जन खुला ठाउँहरूको संरक्षण गर्दै पार्क निर्माणको काम सुरु गरिएको छ । गण्डकी प्रदेश सरकारसँगको सहकार्यमा फेवातालमा मिसिने हर्पन खोलासहित पाँचवटा खोलामा सिल्ट्रेसन ड्याम निर्माण गर्न ३४ करोड रूपैयाँको योजना अघि बढेको छ । यस्तै, महानगरभित्रका सडकको बीचमा पर्ने ८७ बिजुलीका पोल स्थानान्तरण, ३९ किमी कच्ची सडक निर्माण, २ सय २५ किमी पक्की सडक निर्माण, ७३ किमी ढलान र २० किमी नयाँ सडकको ट्रयाक निर्माण, ६५ किमी नाली निर्माण, चालू वर्षमा १ सय ३ किमी सडक चौडा पार्ने कार्य सम्पन्न भएका छन् । विभिन्न स्थानहरूमा ७९ किमी पक्की नाला निर्माण, ३ सय ४७ वटा कलभर्ट निर्माण, ३१ वटा कजवे निर्माण, ३६ स्थानमा सिँचाइ पाइप क्रसिङ, ४ किमी रिटेनिङ वाल, ५ किमी ग्याबियन वाल, ७४ किमी सडक ग्राभेलिङजस्ता महत्त्वपूर्ण कार्य यस अवधिमा सम्पन्न गरिएका छन् । यस्तै, २३ किमी सडक कालोपत्र, ३ किमी सडक ढलान गर्ने कार्य बहुवर्षीय योजनाअनुसार अगाडि बढेको छ । चालू वर्षमा करिब २ अर्ब ४३ करोड रूपैयाँ लागतमा १ सय ४७ वटा योजना निर्माण गर्न टेन्डरसमेत भइसकेका छन् । महानगरले अघि बढाएकाे 'एक वडा एक खेल मैदान'अन्तर्गत महानगरका ३३ वडामध्ये २१ स्थानमा खेल मैदान निर्माणको काम सुरु भएको छ । महानगरका विभिन्न १५ स्थानमा सार्वजनिक शौचालय निर्माणको काम अगाडि बढिसकेको छ । १ सय १० किमी खानेपानी लाइन विस्तारको काम अगाडि बढेको छ भने वडाको महानगरको केन्द्रसम्म जोड्ने २७ वटा कनेक्टिङ सडक निमार्णको काम सुरु भइसकेको छ । प्रमुख सडकहरू बलियो बनाउन अस्फाल्ट पिच गरेर लैजाँदै छाैं । सिर्जनाचोकमा अत्याधुनिक आकाशे पुल निर्माण र महानगरका ७ स्थानमा पक्की मोटेरेबल पुल निर्माणका लागि बोलपत्र आह्वान गरी काम सुरु भएको छ । चुनावको बेला जनतासँग गरेका प्रतिबद्धताअनुसारको कार्य गर्न नसकेको जनगुनासो छ, प्रतिबद्धता बिर्सिएको हो र ? लामो समयसम्म मुलुकमा जनप्रतिनिधिविहीन अवस्थामा कर्मचारीको भरमा शासन सञ्चालन हुँदै आएको अवस्थाबाट जनप्रतिनिधि निर्वाचित भएर आएपछि नयाँ संरचनाअनुसार बनेको सरकारसँग जनअपेक्षा बढी हुनु स्वाभाविक नै हो । जनताको सुशासन र विकासप्रतिका जुन अपेक्षा थिए, ती संघीयता कार्यान्वयनका क्रममा कानुन निर्माणदेखि विभिन्न प्रक्रियाहरू पूरा गर्न समय लागेका कारण जनताबाट गुनासो आउनु स्वाभाविक हो । सुशासन दिने प्रयत्न हामीले गरेका छाैं र गर्नुपर्छ पनि । सुशासनलाई जोड दिनुपर्छ भनेर प्रविधिमैत्री वडा कार्यालयहरू बनाएका छाैं । घर नक्सा पास र राजस्व संकलन वडाबाटै हुने व्यवस्था मिलाएका छाैं । ३३ वटै वडामा सफ्टवेयर र इन्टरनेट पुर्याएर सेवा दिइरहेका छाैं । सुविधा सम्पन्न यातायात प्रणाली र फेरिँदो प्रविधिको उपयोगमार्फत् पोखराको पर्यटन विकास गर्न हरित शहर र व्यवस्थित यातायात गुरुयोजना तयार गर्न दक्षिण कोरियाली सरकारको सहयोगमा गुरुयोजना तयार पार्ने काम अगाडि बढिसकेको छ । तर, प्रतिबद्धताअनुसार गर्नुपर्ने काम धेरै छन् । अबको करिब तीन वर्षको अवधिमा महानगरमा वास्तवमै जनताले सुशासनको प्रत्याभूति गर्नेगरी कार्य गर्नेछाैं । पोखरालाई स्मार्ट सिटी बनाउने विषय कहाँ अड्कियो ? महानगरलाई व्यवस्थित र पूर्वाधारयुक्त बनाउन हामीले विभिन्न चरणमा योजनाबद्ध रूपमा कामलाई अगाडि बढाएका छाैं । पोखरालाई सुरक्षित र व्यवस्थित तुल्याउन छिमेकी मित्रराष्ट्र चीन र दक्षिण कोरियासँग परामर्श गरेका छाैं । रिजल्ट निकाल्न केही समय लाग्छ । महानगरलाई स्मार्ट सिटी बनाउन पूर्वाधारको विकास, अत्याधुनिक स्वास्थ्य, सुशासन, सुरक्षाको प्रत्याभूति, पार्किङ, सडक, यातायात, ढल, ग्रिनरी व्यवस्थापनलगायतका थुप्रै योजना आवश्यक रहेकाले ती कार्यमा लागिरहेका छाैं । पोखरा महानगरपालिका आधुनिक शहर हुनेछ । पोखरालाई विश्वका राम्रा शहरसँग तुलना गर्न सक्ने शहर बनाउने अभियान जारी छ । तीन तहका सरकारबीच आवश्यक समन्वय नहुँदा कार्यसम्पादनमा असर परेको गुनासो जनप्रतिनिधिको सुनिन्छ, पोखराको पनि समस्या यही हो ? संघीयता लागू भएको करिब तीन वर्ष भएको छ । यो शिशु अवस्थामा छ । आफ्नै विधि र प्रक्रियामार्फत यसको कार्यान्वय अगाडि बढिरहेको छ । संघीयता कार्यान्वयन गर्नेहरूबाट अझ उदारताका साथ प्रदेश र स्थानीय निकायलाई अधिकार प्रत्यायोजन गर्न कन्जुस्याइँ भइरहेको छ । उदाहरणका लागि करोड रूपैयाँसम्मका काम गर्न पालिकाहरू तयार छन् तर संघीय सरकारले साना योजनाहरू पनि आफ्नै मातहतमा राखेको छ । पोखरा महानगरपालिकाभित्रका १ करोड रूपैयाँभन्दा साना करिब २० वटाजति योजना संघीय सरकारले आफ्नै मातहत राखेको छ । करोडका योजनासमेत संघीय सरकारले आफ्नो मातहत राखेर छुद्र मानसिकता देखाएको छ । संघीय सरकारको अधिकार प्रत्यायोजनमा देखाएको छुद्रताले हाम्रो विकासको मोडल र संघीयतामा अधिकार प्रत्यायोजनलाई उजागर गर्छ । स्थानीय सरकार सञ्चालन ऐनले ६ महिनाभित्र जिल्ला प्रशासन, जिल्ला प्रहरी, कोष तथा लेखा नियन्त्रक, जिल्ला सरकारी वकिलको कार्यालयबाहेक सबैको चल अचल र जनशक्ति सम्बन्धित पालिकामा हस्तान्तरण हुनेछ भनेको छ । तर, अहिलेसम्म पनि हस्तान्तरण भएको छैन । अधिकार प्रत्यायोजनमा संघीय सरकारको कन्जुस्याइँले संघीयता कार्यान्वयमा समस्या पारिरहेको छ । स्मार्ट सिटी भन्नुहुन्छ तर घर तथा भवन मापदण्डसमेत हालसम्म कार्यान्वयन गर्न सक्नु भएन, यस्तो अवस्थामा कसरी सम्भव छ स्मार्ट सिटी ? पोखरामा यसअघि कायम भएको मापदण्डअनुसार १७ मिटर अर्थात् साढे दुई तल्ला अग्ला घर बनाउन पाइन्छ । त्योभन्दा माथिको स्वीकृति हुँदैन । यसलाई समयसापेक्ष र जमिनको भौगर्भिक अवस्थाअनुसार परिमार्जन गर्न आवश्यक ठानेर हामी निर्वाचित भएर आएपछि एउटा प्राविधिक र विज्ञसहितको समिति बनाएर अध्ययनसमेत गरेका छाैं । समितिले पनि प्रतिवेदन बुझाइसकेको छ । समितिको प्रतिवेदनका साथै अब भूउपयोग नीति बनाएर बनाएर कहाँ के गर्ने र कति अग्ला र कस्ता घर तथा भवन बनाइदिने भनी प्रस्ट गर्छाैं । पोखराको सबै ठाउँ जोखिमपूर्ण छैन । भूगर्भ विभागले सिफारिश गरेको अवस्थाअनुसार जहाँजहाँ जोखिम हुँदैन, त्यहाँ त्यसैअनुसारका घर तथा भवन बनाउन मिल्ने गरी नयाँ मापदण्ड तोकिनेछ । केही मापदण्डविपरीत घर बनेका छन् । हामी चुप लागेर बसेका छैनौं । तिनीहरूलाई अब महानगरले दायरामा ल्याउने प्रक्रियासमेत सुरु गरेको छ । पोखराको यातायात र पार्किङको समस्या कसरी व्यवस्थापन गर्दै हुनुहुन्छ ? मुख्य चोकहरूमा ट्राफिक लाइट राख्न प्राविधिकको खोजी गरिरहेका छाैं । अर्बान ट्रान्सपोर्टेसनलाई थप व्यवस्थित बनाउनका लागि गुरुयोजना बनाउँदै छाैं । सडक र यातायातसँगै पोखराको ढललाई व्यवस्थित बनाउन लागिरहेका छाैं । अहिले पानी परेको समयमा वा वर्षायाममा पोखराका सडकहरूमै बाढी बगिरहेको अवस्था छ । यसको अन्त्यका लागि महानगरले विशेष रूपमा सोचिरहेको छ । केही समयभित्रै ढल निर्माण गरेर यसलाई व्यवस्थित बनाउँछाैं । पोखरालाई सुरक्षित पार्नेबारेमा चिनियाँसँग पनि परामर्श गरिरहेका छाैं । पोखरालाई हरित शहर र व्यवस्थित यातायात प्रणाली सञ्चालन गर्न गुरुयोजना बनाउन दक्षिण कोरियासँग सम्झौता भइसकेको छ, काम कसरी भइरहेको छ ? कोरियासँग हरित शहर र व्यवस्थित यातायात गुरुयोजना तयार गर्न सम्झौता गरेका छाैं । यसको सम्भाव्यता अध्ययन गर्न कोरियाली टोेली पोखरामा नै छ । हामीले कोरियास्थित ग्याङवोन प्रान्तको सहयोगमा पोखराको यातायात गुरुयोजना बनाउन लागेका छाैं । कोरियाली सरकारले सम्भाव्यता अध्ययनका लागि कन्सल्ट्याण्टसमेत तोकिदिएको छ । ग्रिन टेक्नोेलोजी सेन्टर नामक संस्थाले सन् २०१९ भित्रै सम्भाव्यता अध्ययन गरिसक्ने गरी काम थालेको छ । आगामी माघसम्म प्रस्तावना तयार गरेर कोरियाली सरकारलाई बुझाउने र सन् २०२१ सम्म आयोजनाका सबै काम पूरा गर्ने गरी तीव्र गतिमा काम अगाडि बढेको छ । पुसअघि नै अध्ययन प्रतिवेदन तयार हुन्छ । कोरियाली कम्पनीले हाल भियतनाम, युगाण्डा र भुटानमा पनि यही अवधारणामा काम गरिरहेको छ । फरक नगरको रूपमा विकास गर्न नगरमा भएका सम्भावनाका क्षेत्रहरू पहिचान भएका होला नि ? पोखरा नेपालको मात्र होइन, विश्वकै मनमोहक र आकर्षक शहर हो । पोखरा महानगरबाट नेपालका अन्य नगरपालिका, गाउँपालिका र समग्र विश्वलाई नै शिक्षा बन्ने खालको महानगर निर्माण गर्न आवश्यक छ । पोखरामा प्रचुर मात्रामा पर्यटनको सम्भावना छ । नौवटा ताल महानगरभित्रै छन् । पातले छाँगो, गुप्तेश्वर गुफा, महेन्द्र गुफा, अन्तर्राष्ट्रिय संग्रहालय, गुम्बा, सेती नदी, धार्मिक पर्यटनका लागि प्रसिद्ध मठ मन्दिर, सराङकोटलगायतका पर्यटकीय स्थलहरू पोखराको समग्र विकासका पूर्वाधार नै भने हुन्छ । यी क्षेत्रहरूको विकासबाट मात्र यहाँको समृद्धि सम्भव छ । त्यसैले पर्यटन पूर्वाधार विकासमा हाम्रो विशेष ध्यान छ । यी कार्य गर्न जनशक्तिको व्यवस्थापन कसरी गर्नुभएको छ ? महानगरमा आवश्यक प्राविधिक जनशक्तिको अभाव छ । सबै वडामा इन्टरनेट र कम्प्युटरको व्यवस्था भइसकेको छ । तर, त्यसलाई प्रयोग गर्ने जनशक्ति अझै पनि कम छ । महानगरमा प्राविधिक जनशक्तितर्फ इन्जिनियरहरूको व्यवस्था भए पनि सडक इन्जिनियर थिएनन् । मेकानिकल इन्जिनियर थिएनन् । आर्किटेक्ट छैन । स्ट्रक्चरल इन्जिनियर छैन । तर, हामीले सडक इन्जिनियर राख्यौं । मेकानिकल इन्जिनियर राखिसक्यौं । अरू विषयगत विज्ञ इन्जिनियर पनि राख्नु छ । खानेपानीसम्बन्धी इन्जिनियरको समेत व्यवस्था गरेका छाैं । प्रविधिसँग खेल्न जान्ने कर्मचारीको अभाव छ । कर अनलाइन सिस्टममा लगिएको छ । त्यसलाई चलाउन सक्ने कर्मचारी थोरै छन् । प्रकाशित मिति: सोमबार पौष २१, २०७६/Monday 01-06-2020 तपाईको प्रतिक्रिया सम्बन्धित खबर सबै महाकाली नगरपालिकाका नगर प्रमुख चैसिर भन्छन् : ‘शिक्षा पहिलो प्राथमिकतामा’ ‘सुदूरपश्चिम उच्च जोखिममा छ, राष्ट्रिय संकट आउन सक्छ’ ‘म नायिका बन्दिनँ, हामीले अब हेर्ने चश्मा फेर्नुपर्छ’: अनुष्का श्रेष्ठ सात महिनासम्म पनि प्रधानमन्त्रीलाई भेट्न पाइनँ सरकार अलोकप्रिय भयो, त्यसैले हाम्रो जनमत बढ्यो पढ्नै पर्ने लोकप्रिय के हो मालिकार्जुन दार्चुला सेवा समिति ? राष्ट्रपति भण्डारीको भ्रमणको उपलक्ष्यमा गाउँपालिकाद्धारा स्थानीय विदा जिल्ला अस्पताल दार्चुलाका डाक्टर लिम्बुको विदाई प्रिन्स ब्याडमिन्टनबाट ओलम्पिक खेल्ने पहिलो नेपाली खेलाडी बन्दै दार्चुलाको तिंकर नाका अझै खुलेन विश्वासको मतपछि माओवादी सुदूरपश्चिम सरकारमा सहभागि हुने अत्तर लण्डनैको गीत सार्वजनिक