दार्चुलामा कोरोना सङ्क्रमण : सदरमुकाममा घट्यो, गाउँमा फैलियो

दार्चुलाको सदरमुकाम खलंगा बजारमा कोरोनाको सङ्क्रमण दर घटे पनि ग्रामीण क्षेत्रमा बढेको छ । पछिल्ला केही दिनयता सङ्क्रमित हुनेहरुमा ग्रामीण क्षेत्र बढि छन् । परीक्षण गरेको ठाउँमा सङ्क्रमित भेटिएका छन् । 
परीक्षण गरिएकामध्ये अधिकाशंमा कोरोना सङ्क्रमण पुष्टि हुने गरेको छ । स्वास्थ्य कार्यालय दार्चुलाका कोरोना फोकल पर्शन विरेन्द्रराज भट्टका अनुसार केही दिनयता खलंगा बजारभित्र सङ्क्रमण दर घटे पनि ग्रामीण क्षेत्रमा बढ्दो क्रममा देखिएको बताउनुभयो ।
सदरमुकाममा सङ्क्रमणदर घट्नुमा गत वैशाख २५ गतेदेखि भएको निषेधाज्ञाको प्रभाव परेको जिल्ला कोभिड–१९ सङ्कट व्यवस्थापन केन्द्रका सदस्यहरुको विश्लेषण छ । खलंगा बजारमा नयाँ सङ्क्रमित थपिने क्रम घटेको छ तर ग्रामीण क्षेत्रमा थपिएकाले समग्र जिल्लाको अवस्था स्थिर छ ।
ग्रामीण क्षेत्रमा परीक्षणको दायरा बढाएसँगै सङ्क्रमित पहिचान हुन थालेका हुन् । जिल्ला अस्पताल दार्चुलाकोे आइसोलेशनमा उपचाररत अधिकांश सङ्क्रमित ग्रामीण क्षेत्र र पालिकाको आइसोलेशनबाट रिफर भएर आएकाहरु छन् ।
जिल्ला असपताल दार्चुलाका सूचना अधिकारी डम्मरदत्त भट्टका अनुसार हाल १२ जना कोरोना संक्रमतिको अस्पतालमा उपचार भइरहेको छ।  जसमा महाकाली नगरपालिका ३ जना, दुहुँ नौगाड गाउँपालिकाका समान  २÷२ जना, लेकम गाउँपालिका १ जना, कन्चनपुर बुटवलका समान १÷१ जना मालिकार्जुनका १ जना गरी १२ जनाको उपचार भइरहेको छ ।
अस्पतालमा २ जनाको भेन्टिलेटरमा उपचार भइरहरको छ भने अन्य १० जना आइसोलेसनमा रहेको अस्पतालले जनाएको छ।
निषेधाज्ञा भएपछि शहरी क्षेत्रबाट ग्रामीण क्षेत्रमा गएका तथा अन्य माध्यमबाट भित्रिएको कोरोनाको सङ्क्रमण विवाह, व्रतबन्ध्र, किरिया जस्ता सांस्कृतिक कार्यमा भएको जमघट र भोज भतेर मार्फत फैलिएको स्वास्थ्यकर्मी बताउँछन् । 
खार स्वास्थ्य चौकी इन्चार्ज गोविन्दसिह ठगुन्ना गाउँमा हुने विहे पार्टी भोजभतेरका कारण गाउँमा कोरोना संक्रमण बढेको छ । दिनहुँ भीडभाड रोकिएको छैन् । कोरोनाका लक्षण देखिएका विरामी सबै ठाउँमा भेटिन्छन, उहाँले भन्नुभयो, बाहिरबाट आएकाहरु क्वारिन्टाईनमा नबसीसिधै गाउँमा गएपछि कोरोना संक्रमण गाउँमा फैलिएको हो ।
स्वास्थ्य सुरक्षाको मापदण्ड पालना नभएको कारण ग्रामीण क्षेत्रमा कोरोना महामारी नियन्त्रणमा चुनौती देखिएको छ । जिल्लामा मंगलबारसम्म २ जना महिला सहित १० जनाको मृत्यु भएको छ । जिल्लामा कुल संक्रमितको संख्या मंगलबारसम्म ५९१ पुगेको छ । भने कोरोनामुक्त हुनेको संख्या २१७ पुगेको छ ।