दार्चुलामा जुट्दै सहयोग : सहज बन्दै उपचार

दार्चुलामा कोभिड–१९ महामारीबिरुद्ध अग्रपङ्क्तिमा रही सेवा दिने स्वास्थ्यकर्मीको सुरक्षा र सङ्क्रमित बिरामीको उपचार सहज बन्दै गएको छ । सुरक्षित रही काममा खट्नुपर्ने स्वास्थ्यकर्मी र बिरामीका उपचारका लागि स्वास्थ्य सामग्री सहयोग जुट्दै गएपछि सहज भएको हो । 
मंगलबार मात्रै जिल्ला अस्पतालमा ४० थान अक्सिजन सिलिण्डर भरेर जिल्ला पुरयाइएको छ । राष्ट्रिय अविष्कार केन्द्रबाट प्राप्त ८ थान सिलिण्डर, पिपिई सेट तथा फेस शिल्डमध्ये ४ थान अक्सिजन सिलिण्डर,  पिपिई र फेसशिल्ड ५÷५ थान प्राप्त भएको जिल्ला अस्पताल व्यवस्थापन समिति अध्यक्ष दलजितसिंह धामीले बताउनु भयो ।
दार्चुला कोभिड–१९ सहयोग तथा समन्वय मञ्चको सहजीकरणमा स्वास्थ्य सामग्री तथा अक्सिजन सिलिण्डर जिल्ला पुगेको हो । महाबीर पुनले राष्ट्रिय अविष्कार केन्द्रका तर्फबाट दार्चुलालाई प्रदान गरेका अक्सिजन सिलिण्डर मञ्चको सहजीकरणमा काठमाण्डौबाट जिल्ला पठाइएको मञ्चका संयोजक कृष्ण महराले बताउनु भयो । 
राष्ट्रिय आविष्कार केन्द्रबाट प्राप्त ८ थान अक्सिजन सिलिण्डर मध्ये ४ थान गोकुलेश्वर अस्पताललाई र ४ थान जिल्ला अस्पताल दार्चुलालाई हस्तान्तरण गरिएको छ ।
जिल्ला अस्पतालका १० थान र अपि हाइड्रोपावर कम्पनीबाट संकलन गरिएका १० थान गरी २० थान अक्सिजन सिलिण्डर ह्युमानिटी फाउण्डेशनको सहयोगमा नेपालगञ्जमा भरेर जिल्ला ल्याइएको अस्पताल व्यवस्थापन समिति अध्यक्ष धामीले बताउनु भयो ।
‘पछिल्लो सयम विभिन्न क्षेत्रबाट सहयोग जुट्दै छ’, जिल्लास्थित कोभिड–१९ सङ्कट व्यवस्थापन केन्द्रका संयोजक समेत रहनु भएका पमुख जिल्ला अधिकारी सिद्धराज जोशीले भन्नुभयो, सङ्क्रमण र मृत्यु दर घट्दैछ, निको हुने बढ्दै छन् , सहयोगी हात थपिँदै छन्, अब केही सहज हुँदै जानेछ । 
जिल्ला अस्पताल अस्पताल दार्चुला तथा गोकुलेश्वर अस्पताल लगात जिल्लाका अन्य ठाउँहरुमा बुझदा सबै ठाउँमा कोरोनाका विरामीहरुको अवस्था समान्य छ ।
विभिन्न संस्था र व्यक्तिले खुला हृदयले अस्पतालहरुलाई अक्सिजन सिलिण्डर र अन्य स्वास्थ्य सामग्री सहयोग बढाउँदै लगेका छन् । सामाजिक क्षेत्रबाट भइरहेको सहयोगले उपचारमा खट्ने चिकित्सक र स्वास्थ्यकर्मीमा पनि ऊर्जा प्राप्त भएर सेवामा लाग्न हौसला बढेको व्यवस्थापन समिति अध्यक्ष धामीले बताउनुभयो ।