स्वास्थ्य सेवा बढाउँदै मार्मा : कोभिड अस्पतालले विरामीलाई उपचारमा सहज

दार्चुलाको मार्मामा कोभिड अस्पताल निर्माणपछि विरामीलाई सहज बनेको छ । गत वर्षबाट सञ्चालनमा आएको कोभिड अस्पतालले मार्मा गाउँपालिका र अपिहिमाल गाउँपालिकाका विरामीलाई उपचारमा सहज भएको हो ।
जिल्लामै अस्पताल निर्माण गरेर डाक्टर नियुक्त गर्ने मार्मा गाउँपालिका पहिलो हो । गत वर्षदेखि निरन्तर रुपमा गाउँपालिकाले डाक्टर महादेव भट्ट मार्फत स्वास्थ्य सेवा दिइरहेको छ । 
यो वर्ष कोभिड अस्पतालमा ९ जना विरामी भर्ना भएर उपचार भइरहेको डाक्टर भट्टले बताउनुभयो । उहाँले भन्नुभयो, आफु नियुक्त भएपछि विरामी आउने क्रम बढेको छ । कोरोनाका मात्र नभई अन्य रोगका विरामीको चाँप बढेको छ ।
मार्मा गाउँपालिकाले स्वास्थ्य चौकीलाई स्तरोन्नती गर्दै आफ्नै लगानीमा डाक्टर नियुक्त गरेको थियो । जसको कारण अहिले गाउँ घरमै स्थानीयले सहज स्वास्थ्य सेवा पहुँच पाएका छन् ।
गाउँपालिकाले कोभिड अस्पतालको लागि ४० लाख मूल्य बराबरको स्वास्थ्य सामग्री यसै साता खरिद गरेको डाक्टर भट्टले बताउनुभयो । बजेमाटर्फत एक्सरे, अल्ट्रासाउण्ड सेवा सुरु गरिएको छ, । विरामीको चाँप बढ्दै गएपछि अस्पतालको लागि चाहिने सामग्री थप गरिएको भट्टको भनाई छ ।
विगतमा मार्मा र अपिहिमाल गाउँपालिकाका विरामीले स्वास्थ्य सेवा लिन शैल्यशिखर नगरपालिकामा रहेको गोकुलेश्वर अस्पताल आउनुपर्ने थियो । गत वर्षदेखि मार्मामै चिकत्सिय सुविधा थप भएपछि विरामीले गोकुलेश्वर आउनुपर्ने बाध्यता हटेको मार्मा गाउँपालिका अध्यक्ष जमनसिह धामीले बताउनुभयो । 
नागरिकलाई सहज रुपमा सेवा दिन आफ्नै स्रोत साधनमा डाक्टर नियुक्त गरेपछि विरामीले सहज रुपमा सेवा पाएका छन्, अध्यक्ष धामी भन्नुहुन्छ, अझै पनि अस्पतालको सबै सेवा उपलब्ध गराउने गरी तयारी गरिदैछ । 
दार्चुलाको मालिकार्जुन गाउँपालिका, जिल्ला अस्पताल र गोकुलेश्वर अस्पतालमा पनि कोभिड अस्पताल सञ्चालनमा छ । जिल्लाका अन्य स्थानीय तहले भने डाक्टर नपाउँदा कोभिड अस्पताल प्रभावकारी बनेको छैन् ।