मृत्यु भएको २४ घण्टापछि गरियाे माना दमाइको दाहसंस्कार

बैतडीको सिगास गाउँपालिका–१ का प्रकाश दमाईकी आमा माना दमाइको शनिवार ६१ वर्षको उमेरमा मृत्यु भयो । मलामी नपाएर उनको शव २४ घण्टा सम्म घरको आगनमा छोरा प्रकाशले टुलुटुलु हेरी बसेका थिए । 
बैतडीका प्रकाश दमाईकी आमाको शव २४ घण्टापछि घाट लगिएको छ । मलामी नपाएर घरको आँगनमै राखिएको शव २४ घण्टापछि ट्याक्टरमा राखेर पाटन नगरपालिका–६ सुर्नयागाडमा रहेको तिपडा घाट पु¥याइएको हो । 
छिमेकी कसैले पनि मलामी जान नमानेपछि ट्याक्टर प्रयोग गरेर सीमित आफन्तले शवको दाहसंस्कार गरेका छन् ।
प्रकाश गाउँमा रहेको भूमिराज आधारभूत विद्यालयका शिक्षक हुन् । तर उनलाई छिमेकी कसैले पत्याएनन् । तराईबाट आएका आफन्तहित दुईजना गैरदलित समुदायका गरी १८ जना शवयात्रामा सहभागी भए ।
करिब तीन सयजनाको बसोबास रहेको सिगास–१ अङडेगाडा गाउँमा प्रकाशको परिवार दमाई समुदायको एक्लो हो ।
उनकी ६१ वर्षीया आमा मानाको शव बोक्न कोही स्थानीय नमानेपछि झन्डै अढाई सय किलोमिटर टाढा कञ्चनपुरको महेन्द्रनगर तथा दोधारा चाँदनी र पाटन– ६ बाट आफन्त आएपछि दाहसंस्कारका लागि लगिएको हो । त्यसअघि छिमेकी कसैले पनि मलामी जान मानेनन् ।
आइतबार बिहान ११ बजे शवयात्रा सुरु सहभागी स्थानीय नरबहादुर साउदले बताए । छिमेकी डडेल्धुराबाट आफन्तको घरमा आएका साउदले शनिबार प्रकाशको घरमा पुगेर राति पनि सघाएका थिए । आइतबार बिहान शवयात्रामा सहभागी भएका उनले गैरदलित समुदायबाट दुईजना मात्र मसानघाट पुगेको जानकारी दिए ।
सिगास–१ स्थित घरभन्दा आधा घण्टानजिक डुब्के घाट रहे पनि आमाको मरणोपरान्त इच्छाअनुसार शवलाई करिब ५० किलोमिटर टाढाको पुख्र्यौली घाट पाटनमा दाहसंस्कार गरिएको प्रकाशले बताए ।
सिगासनजिकका जिप तथा ट्याक्टर व्यवसायीले समेत शव बोक्न नमानेपछि पाटनबाट ट्याक्टर बोलाएर उठाइएको हो ।
सिगास–१ का वडासदस्य धनीराम भट्ट राति १२ बजेसम्म प्रकाशकै घरमा शव कुरेर बसे । तीबाहेक कसैले पनि सहानुभूति दिएनन् ।
दलित भएकै कारण प्रकाशकी आमाको शव २४ घण्टासम्म घरमै राख्नु परेको हो । छिमेकीले सामाजिक मर्यादा र मानवताको धर्मसमेत निर्वाह गर्न नसकेपछि चौतर्फी आलोचना भइरहेको छ ।
केही सामाजिक मान्यताका कारण शनिबार शव उठ्न नसकेको वडाध्यक्ष रामचन्द्र ऐरीले स्वीकार गरेका छन् । ऐरीका अनुसार स्थानीयले नै शवयात्राका लागि केही रकम उठाएर प्रकाशको परिवारलाई सहयोग गरेका छन् ।