बाजुरामा नेपाल टेलिकमको जीप दुर्घटना, तीन जनाको मृत्यु, दुई घाइते

बाजुरामा जीप दुर्घटना हुँदा तीनजनाको मृत्यु भएको छ । जिल्लाको जगन्नाथ गाउँपालिकामा मंगलबार जीप दर्घटना हुँदा तीन जनाको घटनास्थलमै मृत्यु भएको छ, भने अन्य दुई जना घाइते भएका छन ।
मृत्यु हुनेमा धनगढी उपमहानगरपालिका घर भई हाल नेपाल टेलिकम बाजुराका कार्यालय प्रमुख अन्दाजी ५५ वर्षीय लोकबहादुर खड्का, जीप चालक अन्दाजी ४० का करन महतरा र बडीमालिका नगरपालिका वडा नम्बर ७ का अन्दाजी २८ वर्षीय रविन्द्र धामी रहेको प्रहरीले जानकारी दिएको छ ।
जीप दुर्घटनामा परी घाइते हुनेमा बुढीनन्दा नगरपालिका–२ कोल्टीका अन्दाजी २५ वर्षीय नन्दराम तिरूवा र अन्दाजी २२ वर्षीय लोकेन्द्र तिरूवा रहेको जिल्ला प्रहरी कार्यालय बाजुराका प्रमुख प्रहरी नायव उपरीक्षक इकबाल हवारीले जनकारी दिनुभयो । 
सोही गाउँपालिका–३ काडाकोटमा नेपाल टेलिकमको बा ५ च २२०९ नम्बरको जीप दुर्घटना भएको जिल्ला प्रहरी कार्यालय बाजुराका प्रहरी निरिक्षक तथा सूचना अधिकारी देवबहादुर चौधरीले बताउनुभयो । उहाँकाअनुसार घाइते भएका दुई जनालाई एम्बुलेन्समा आधारभूत अस्पताल कोल्टीमा उपचारका लागि ल्याइएको छ । मृतकको प्रहरी मुचुल्का भइरहेको छ । 
नेपाल टेलिकमको टावरमा सोलार जोड्न पिलुचौरबाट गएको उक्त जीप अनियन्त्रित भइ दुर्घटना भएको बताइएको छ । जीप सडकबाट करिब दुई सय मिटर तल खसेको थियो । कच्ची सडक भएका कारण जीप अनियन्त्रित भएर दुर्घटना भएको प्रहरीले जनाएको छ । घटनाको थप अनुसन्धान भइरहेको छ ।