दार्चुलामा भालुको आक्रमणबाट ५८ वर्षिया महिला घाइते, भालुको घाइते अवस्थामा उद्दार 

दार्चुलाको शैल्यशिखर नगरपालिका वडा नम्बर ५ आगरमा घाइते भालुको आक्रमणबाट एक महिला घाइते भएका छन् । भालुले आक्रमण गरी स्थानीय ५८ वर्षीया कलावती रावल घाइते बनाएको हो । शुक्रबार राती ८ बजेको समयमा घाइते अवस्थामा जङ्गली भालु घर भित्र पसेको मालिकार्जुन प्रहरी चौकीका इन्चार्ज मोहन साउदले जानकारी दिनुभयो ।
स्थानीय राम दत्त जोशीको घर भित्र घाइते अवस्थामा रहेको भालुको उद्धार गरिएको छ । प्रहरी र डिभिजन वन कार्यालय दार्चुलाको टोलीले भालुलाई घर बाहिर निकालेको डिभिजन वन कार्यालय दार्चुलाका वन अधिकृत प्रमान्नद कुंवरले बताउनुभयो । भालु गम्भीर घाइते अवस्थामा रहेको उहाँले बताउनुभयो । ‘बाहिर घाउ चोट छैन, मुखबाट रगत निस्केको छ, हलचल गर्न सक्ने अवस्थामा छैन’ उहाँले भन्नुभयो ।
घाइते अवस्थामा रहेको भालुलाई गोकुलेश्वर लगिएको छ । भालुको स्वास्थ्य परिक्षण पछि के कारण घाइते भएको भनेर पत्ता लाग्ने वन अधिकृत कुवरले बताउनुभयो ।