हावाहुरीले विद्यालयको छाना उडायो¸ पढाई प्रभावित

दार्चुलाको शैल्यशिखर नगरपालिका वडा नम्बर ४ तल्लोकाँडापारी मा रहेको भुमिराज आधारभूत विद्यालयको छाना हावाहुरीले उडाएको छ । असार ३ गते सोमवार साँझ चलेको हावाहुरीले विद्यालयको चार कोठे भवनको छाना उडाएको विद्यालय प्रशासनले जनाएको हो ।

विद्यालयका प्रधानाध्यापक शंकरदत्त भट्टले जस्तापाताले छाएको चार कोठे विद्यालय भवनको पूरै छाना उडाएर जमिनमा थुपारेको बताउनु भयो । उनका अनुसार हावाहुरीले पत्थरले छाएको एउटा भवनमा समेत क्षति पुगेको छ ।

भवनमा क्षति पुगेसँगै विद्यालयभित्र रहेका शैक्षिक सामाग्रीमा क्षति भएको छ । २०६५ सालमा निर्माण भएको विद्यालय भवनमा यो दोस्रोपटक हावाहुरीले क्षति गरेको छ । यो ठाउँमा पक्की विद्यालय भवन निर्माण गरेमात्रै विद्यालय सञ्चालन गर्न सकिने अवस्था रहेको प्रधानाध्यापक भट्टको भनाई छ ।

२०५ जना विद्यार्थी अध्ययनरत रहेको विद्यालयको भवनमा क्षति पुगेपछि नियमित पढाई समेत प्रभावित भएको छ । भवनमा क्षति भए पछि पहिलो दिन विद्यार्थीलाई एउटै ठाउँमा राखेर पढायौं उनले भने, यस्तो गर्मीको बेला सबै विद्यार्थी एउटै ठाउँमा राख्न सकिने अवस्था छैन् ।