वडा अध्यक्षको चुनावमा दार्चुलामा ६९ प्रतिशत मत खस्यो

दुहुँ गाउँपालिका–५ मा वडा अध्यक्ष पदको लागि भएको स्थानीय तह उपनिर्वाचनमा झण्डै ६९ प्रतिशत मत खसेको छ । मुख्य निर्वाचन अधिकृतको कार्यालयका अनुसार ६८.९४ प्रतिशत मत खसेको हो । बिहान ७ः१० बजेदेखि मतदान सुरू भएको थियो ।
दुहुँको दुर्गा आधारभूत विद्यालय गरमोराको क र ख मतदान केन्द्रमा ४०१ पुरूष र ४७६ महिला गरि कुल ८७७ जनाले मतदान गरेको मतदान अधिकृत विष्णु प्रसाद अवस्थीले बताए ।
दुहुँ गाउँपालिका–५ मा एक हजार दुई सय ७२ मतदाता छन् । वडा अध्यक्षको लागि एक स्वतन्त्रसहित चार जना प्रतिस्पर्धामा छन् । एमालेबाट मानसिंह बडाल, कांग्रेसबाट धनसिंह कुँवर, माओवादीबाट वीरसिंह कार्की र स्वतन्त्रबाट लालबहादुर कुँवर चुनावी मैदानमा छन् ।
माओवादी केन्द्रबाट निर्वाचित वडाध्यक्ष मनोरथ भट्टको असार २०८० मा मृत्यु भएक पछि निर्वाचन आयोगले स्थानीय तह उपनिर्वाचन गरेको हो ।