दार्चुलामा जटिबुटी सङ्कलन गर्न अनुमतिपत्र वितरण सुरु, खाद्यान्न सहित यर्चागुम्बा सङ्कलकहरु लेकतिर जादै

अपिनाम्पा संरक्षण क्षेत्र कार्यालय दार्चुलाले बहुमूल्य मानिने जटिबुटी यार्चागुम्बा सङ्कलनको लागी अनुमतिपत्र वितरण कार्य सुरु भएको छ । कार्यालयले बैशाख पहिलो साताबाट यार्चागुम्बा तथा जडिबुटी संकलनका लागि अनुमतिपत्र वितरण कार्य सुरु गरेको हो । 
दार्चुलाका जडिबुटी संकलन व्यवसायी, उद्योग वाणिज्य संघ, दार्चुला र सुरक्षा निकायसंगको छलफलपछि अनुमति पत्र वितरण सुरु गरिएको प्रमुख विनय कुमार झाल बताउनुभयो । यार्चागुम्बा ओसारपसार तथा व्यवस्थापन कार्यविधि–२०७३ अनुसार यार्चा पाइने पाटन जेठ १५ देखि असार १५ गतेसम्म खुल्ने भएपनी अनुमतिपत्र वितरण कार्य भने सुरु भएको कार्यालय प्रमुख झाले जानकारी दिनुभयो । 
कार्यालयका अनुसार यार्चा संकलन गर्ने जानेहरुको लागि शुल्क समेत निर्धारण गरिएको छ । जसअनुसार अपिनाम्पा संरक्षण क्षेत्रभित्रका स्थानीयको लागि रु ५ सय शुल्क निर्धारण गरिएको छ । संरक्षण क्षेत्रबाहिर रहेका जिल्लाभरीका संकलकहरुको लागि २ हजार र जिल्लावाहिरका संकलकहरुको लागि ३ हजार रुपैयाँ शुल्क निर्धारण गरिएको छ ।
संकलनका लागि अनुमति पत्र पाए पछि संकलकहरु यर्सागुम्बा लगायतका जटिबुटीहरु संकलन गर्न लेकतिर जान थालेका छन् । अपिहिमाल गाउँपालिकाको सिती, घुसा र खण्डेश्वरीलगायत स्थानका स्थानीयले यार्सागुम्बा सङ्कलन अवधिभर आवश्यक पर्ने सातुसामल (दैनिक उपभोग्य वस्तु र ओढ्ने ओछ्याउने कपडा) पाटनमा पु¥याइसकेका छन् । संरक्षण क्षेत्रको कार्यविधिमा जेठको १५ देखि असारको १५ गतेसम्म पाटन खुला हुने भएपनी संरक्षण क्षेत्रभित्रका स्थानीयहरु यार्चागुम्बा सङ्कलनका लागि चाँडै जाने गरेका छन् । स्थानीयको मुख्य आयस्रोतका रूपमा रहेको हिमाली बहुमूल्य जडीबुटी यार्चागुम्बा सङ्कलन गर्ने समय सुरु भएको अपिहिमाल गाउँपालिका पर्यटक एकाइ शाखाका प्रमुख विसन बुढाथोकीले जानकारी दिए । बुढाथोकीका अनुसार कोही संकलकहरु सातुसामलसहित पाटन सम्म पुग्ने बाटोको अवस्था, यार्चागुम्बा पाइने पाटनमा रहेको हिउँ पग्ले नपग्लेको बारे जानकारी लिएर फर्किएका छन् भने कोही बन्दोबस्तका समानहरु लिएर लेकतिर उक्लिरहेका छन् । 
दार्चुलाको अपिहिमाल, ब्याँस, दुहुँ र नौगाड गाउँपालिकाका अधिकांश स्थानीयहरु यार्चागुम्बा र जडीबुटी संकलन गर्न लेकतिर जाने गरेका छन् । लोलु, अपि फेद, सतगङ्गा, काटै, घट्टेखोला, चाइमटेला, धरमघर, क्षति, नाम्पा, दोपाखे, दुम्लिङलगायतका पाटनमा यार्चागुम्बा पाइने गरेको छ । 
यस वर्ष आठ सय किलोग्रामका लागि सङ्कलन अनुमतिपत्र दिइने योजना बनाएको अपिनाम्पा संरक्षण कार्यालयले अनुमति विना यार्सागुम्बा लगायत अन्य जडिबुटी संकलन नगर्न भनेको छ ।