एसीसी प्रिमियर लिग : हङकङमाथि नेपालको सहज जीत

ओमानमा जारी एसीसी प्रिमियर लिगमा नेपालले हङकङमाथि सहज जीत हासिल गरेको छ । बलियो प्रतिस्पर्धी मानिएको हङकङमाथि नेपालले ८ विकेटको सहज जीत हासिल गरेको हो । हङकङलाई हराउन नेपालले बलिङ, ब्याटिङ र क्षेत्ररक्षण तीनै पक्षमा उत्कृष्ट प्रदर्शन गरेको छ । यो नेपालको तेस्रो लगातार जीत हो । 
टस जितेर पहिले फिल्डिङ रोजेको नेपालले कसिलो बलिङ र धारिलो फिल्डिङ गर्दै हङकङलाई ११४ रनमा अलआउट गर्यो । हङकङका ओपनर अंशुमान रथले सर्वाधिक ३४ रनको योगदान दिए । अन्य ब्याट्सम्यानले उल्लेख्य रन बनाउन सकेनन् ।
बलिङमा नेपालका अविनाश बोहराले तीन विकेट लिए । यस्तै, ललित राजवंशी र दिपेन्द्रसिंह ऐरीले २–२ विकेट बाँडेका थिए ।
११५ रनको सहज लक्ष्य लिएर मैदानमा उत्रेको नेपाल सुरुबाटै आक्रमक अन्दाजमा प्रस्तुत भयो । ओपनिङ जोडी आसिफ शेख र कुशल भुर्तेलले नेपाललाई विष्फोटक सुरुवात दिलाएपछि नेपालले पछाडि फर्केर हेर्नु परेन ।
ओपनिङ जोडीले हङकङका बलरमाथि पूर्णरुपमा हावी भएर खेलेका थिए । आसिफ र कुशलबीच पहिलो विकेटका लागि ५.२ ओभरमा ७० रनको साझेदारी भएको थियो । कुशल १९ बलमा २ छक्का र ३ चौकासहित ३२ रन बनाएर आउट भए । आसिफले १८ बलमा ३ छक्का र ३ चौका प्रहार गर्दै ४० रन जोडे ।
जितको औपचारिकता कप्तान रोहित पौडेल र सन्दीप जोराले पूरा गरे । रोहितले २० बलमा तीन चौकासहित २५ रन र सन्दीपले १७ बलमा १ चौका र १ छक्कासहित १९ रन बनाएका थिए ।
यसअघि नेपालले मलेसिया र कतारलाई पराजित गरेको थियो । नेपाल अंकतालिकाको शीर्षस्थानमा रहेको छ ।