अनेरास्ववियुद्वारा आयोजित वादविवाद प्रतियोगितामा गलैनाथ मावि झरकाँडाका युवराज जोशी प्रथम

अखिल नेपाल राष्ट्रिय स्वतन्त्र विद्यार्थी युनियन जिल्ला कमिटी दार्चुलाद्वारा आयोजित शैल्यशिखर नगरपालिका स्तरीय वादविवाद प्रतियोगिता सम्पन्न भएको छ । “सामाजिक सञ्जालको प्रयोगः बरदान कि अभिशाप’’ भन्ने विषयमा सञ्चालन गरिएको वादविवाद प्रतियोगितामा गलैनाथ माध्यमिक विद्यालय झरकाँडाका छात्र युवराज जोशी प्रथम भएका हुन् । 
प्रतियोगितामा शैल्यशिखर नगरपालिकाभित्रका नौँ वटा माध्यमिक विद्यालयको सहभागीता रहेको प्रतियोगितामा गोकुलेश्वर माध्यमिक विद्यालयका छात्र कमलेश बिष्ट द्धितीय र सत्यप्रकाश माध्यमिक विद्यालय देथलाका छात्र आयुश प्रशाद भट्ट तृतीय भएको अनेरास्ववियु जिल्ला कमिटी अध्यक्ष नरेन्द्र प्रशाद जोशीले जानकारी दिनुभयो ।
कार्यक्रममा शुभकामना मन्तव्य राख्दै गोकुलेश्वर माध्यमिक विद्यालयका प्रध्यानाध्यापक पिताम्बर बिष्टले अनेरास्ववियुले समय सुहाउदो कार्यक्रमहरु सञ्चालन गरिरहेको भन्दै विद्यालयको तर्फबाट धन्यवाद ज्ञापन गर्नुभएको छ ।
वर्तमान परिवेशमा विद्यार्थी आन्दोलनको रुपरेखा फेरिएको उहाँको भनाई छ । हिजो व्यवस्था परिवर्तनका लागि सडकबाट आवाज उठाएका विद्यार्थी संगठनले अब शैक्षिक गुणस्तर सुधार, पाठ्यक्रमको एकरुपता र वैज्ञानिकता संगै विद्यालयको भौतिक तथा प्रशासनिक सुधारकालागी सहयोग गर्न समेत सुझाव दिनुभयो ।
नगरपालिकाको वडा नम्बर ९ मा रहेको गोकुलेश्वर माध्यमिक विद्यालय गोकुलेश्वरमा आयोजित कार्यक्रममा अनेरास्ववियु दार्चुलाका अध्यक्ष नरेन्द्र प्रसाद जोशीको अध्यक्षता एंव नेपाल राष्ट्रिय शिक्षक संगठन दार्चुलाका उपाध्यक्ष भुवन डाँगाको प्रमुख आतिथ्यता रहेको थियो । त्यस्तै कार्यक्रममा गोकुलेश्वर माध्यमिक विद्यालयका प्रध्यानाध्यापक पिताम्बर बिष्ट, शिक्षक विद्यार्थी, शिक्षाप्रेमी लगायत सरोकारवालाहरुको उपस्थिति रहेको थियो ।