दार्चुला भन्सार कार्यालयको राजस्व बढ्यो

दार्चुला भन्सार कार्यालयले दार्चुलाको भन्सार राजस्व बढेको छ । चालू आर्थिक वर्षको ११ महिनामै राजस्वको लक्ष्य भेट्टाएको हो । 
भन्सार कार्यालय दार्चुलाले चालू आर्थिक वर्षको ११ महिनामा ५४ लाख ९ हजार ७३५ रुपैयाँ राजस्व संकलन गरेको भन्सार कार्यालय दार्चुलाका प्रमुख शिवचन्द्र प्रसादले जानकारी दिए । 
कार्यालय प्रमुख प्रसादका अनुसार चालू आर्थिक वर्षको साउन महिनामा ६ लाख ७० हजार ४ सय ८१ रुपैयाँ, भदौ महिनामा ४ लाख ६ हजार ७१ रुपैयाँ, असोज महिनामा ४ लाख ४९ हजार १ सय ६८ रुपैयाँ राजस्व संकलन भएको छ । 
यस्तै कात्तिक महिनामा ४ लाख १३ हजार २ सय १ रुपैयाँ, मंसिरमा ३ लाख ६८ हजार ९३ रुपैयाँ, पुस महिनामा ३ लाख २७ हजार ४ सय ८० रुपैयाँ, माघमा २ लाख ७२ हजार ३ सय ५८ रुपैयाँ संकलन गरिएको छ ।
यसैगरी फागुन महिनामा ४ लाख ५३ हजार ९ सय १२ रुपैयाँ, चैतमा ५ लाख ५० हजार ६ सय २८ रुपैयाँ, वैशाख महिनामा ८ लाख १३ हजार ७ सय ९३ रुपैयाँ र जेठ महिनामा ६ लाख ८४ हजार ५ सय ५० रुपैयाँ राजस्व संकलन भएको उनले जानकारी दिए ।
पछिल्लो समय नेपाल प्रहरी र सशस्त्र प्रहरीको उपस्थितिमा भन्सार कार्यालयले राजस्व बढाउन सहयोग मागेको छ । सुरक्षाकर्मीको कडा चेकजाँचपछि भन्सार कार्यालयमा राजस्व बढेको हो । यसवर्ष दार्चुलाबाट भारततर्फ खरीसमेत निर्यात भएको छ ।