दार्चुलाका ग्रामिण बस्तिमा विद्युतिकरण गरिदै, बीस हजार घरधुरीमा बिजुली बल्यो

दार्चुलाका ग्रामिण बस्तीक घरधुरीहरुमा दार्चुला–डोल्पा ग्रामिण विद्युतिकरण आयोजनाले विद्युतिकरण गरिरहेको छ । उक्त आयोजना मार्फत जिल्लाका विद्युत नपुगेका ७ वटै स्थानीय तहमा विद्युतीकरणको काम गरिरहेको हो ।
परियोजनाले विद्युतको मेनलाइन र शाखालाईन विस्तार गरिरहेको छ भने लाइन विस्तारको काम सकिएको ठाउँहरुकामा लाइन परिक्षण र ट्रान्सफरमर चार्जको काम गरिरहेका दार्चुला–डोल्पा ग्रामिण विद्युतिकरण आयोजनाल इन्जिनियर तथा प्रोजेक्ट म्यानेजर मनोज बस्नेतले बताउनुभयो । म्यानेजर बस्नेतका अनुसार प्रोजेक्टले जिम्मा पाएको १२३ लोडसेन्टरमध्ये ८० वटा लोडसेन्टरमा ट्रान्सफर्मर चढाइसकेको र बाँकीमा समेत असार मसान्तसम्म ट्रान्सफर्मर चार्ज गर्ने लक्ष्यका साथ काम भइरहेको छ । 
यसअघि विद्युत प्राधिकरणले दार्चुलामा दुई सय बढी ट्रान्सफर्मरमार्फत विद्युत वितरण गरेको छ । मार्माको वडा नम्बर १ र अपिहिमालको दुर्गम गाउँहरुमा भगौलिक विकटताका कारण काम गर्न केही ढिलाई तथा कठिनाइ भइरहेको उहाँले बताउनुभयो । लेकमको विकट क्षेत्र रतौडामा केही दिन पहिले ट्रान्सफर्मर राखिएको छ । 
महाकाली, लेकम, मालिकार्जुन, दुहुँ, शैल्यशिखर लगायत अधिकाशं स्थानीय तहमा विद्युतिकरणको काम अन्तिम चरणमा पुगेको छ । व्याँस, मार्मा, नौगाड, अपिहिमालमा पनि काम भइरहेको छ, उहाँले भन्नुभयो, जिल्लाभरी विद्युतिकरणको काम तिब्र गतिमा भइरहेको छ । सबैतिर काम भइरहेकोले विद्युत लाइनका तार र पोल अभाव भइरहेको छ ।
दार्चुलामा हालसम्म ७० प्रतिशत घरधुरीमा बिजुली बलिसकेको छ । करिब २८ हजार घरपरिवार बसोबास रहेको यस जिल्लामा २० हजार घरधुरीमा विद्युतिकरण भएको नेपाल विद्युत प्राधिकरण विद्युत वितरण केन्द्र दार्चुलाका प्रमुख आनन्द सापकोटाले बताउनुभयो । करिब २० हजार घरमा बिजुली पुगिसकेको छ, उहाँले भन्नुभयो, केही महिनापहिलेसम्म एक देखि दुई सय मिटरमात्रै बिक्रि भइरहेकोमा अहिले मासिक चार देखि पाँच सय मिटरको माग आइरहेको छ । मासिक मिटर बिक्रि वितरणको तथ्यांक हेर्दा पनि पछिल्लो समय विद्युतिकरणको काम तिब्र गतिमा भइरहेको देखिन्छ ।
दार्चुलामा अहिलेसम्म शैल्यशिखर नगरपालिकाको बलाँच र महाकाली नगरपालिकाको थालिगाड र मार्मा गाउँपालिकाको सेलभिसा गरी तीन वटा शवस्टेसनमार्फत विद्युत वितरण गरिएको छ । विद्युत् प्राधिकरण प्रादेशिक कार्यालय अत्तरियाका अनुसार लेकम गाउँपालिकाको सिरोडामा सबस्टेसन निर्माणका लागि टेन्डर आह्वान भइसकेको छ । दुहुँ क्षेत्रमा समेत एउटा सबस्टेसन राख्नका लागि प्रकृया अघि बढाइएको वितरण केन्द्र प्रमुख सापकोटाले बताउनुभयो ।