दार्चुलामा कसले कस्तो ल्याए, नीति कार्यक्रम र बजेट

दार्चुलाका तीन वटा स्थानीय तहले नीति कार्यक्रम र बजेट सार्वजनिक गरेका छन् । असार १० गतेभित्र बजेट ल्याइसक्नुपर्ने कानुनी प्रावधानअनुरुप मार्मा गाउँपालिका, मालिकार्जुन गाउँपालिका र शैल्यशिखर नगरपालिकाले आज नीति कार्यक्रम र बजेट सार्वजनिक गरेका छन् । 
स्थानीय सरकार सञ्चालन ऐन, २०७४ अनुसार असार १० गतेभित्र पालिकाहरूले बजेट ल्याउनुपर्ने हुन्छ । सोही अनुरुप तीन स्थानीय तहले नीति कार्यक्रम सार्वजनिक गरेका छन् ।
शैल्यशिखर नगरपालिकाको १५ औं नगरसभाले ०८१।०८२ को लागि नीति कार्यक्रम सार्वजनिक गरेको छ ।  शैल्यशिखर नगरपालिका नगर उपप्रमुख शान्ति खडायतले नीति कार्यक्रमसँगै आगामी आर्थिक वर्षको अनुमानित बजेट समेत नगरसभामा पेश गरेकी छिन् ।
उनले आगामी आर्थिक वर्षको लागि कुल ६० करोड ७४ लाख ४ हजार रुपैयाँको बजेट पेश गरेकी छिन् । जसअनुसार सर्शत अनुदान चालूतर्फ २९ करोड १९ लाख २४ हजार, सर्शत अनुदान पूजीगततर्फ २ करोड ६३ लाख १७ हजार, राजस्व बाँडफाँड संघ ९ करोड ३६ लाख अनुमान गरिएको छ । 
यस्तै प्रदेश सरकाको ५ करोड १६ लाख ८० हजार, समानुकीकरण अनुदान १ करोड १९ लाख ४३ हजार, सर्शत अनुदान चालूतर्फ १० लाख ३० हजार, सर्शत अनुदान पूजीगततर्फ ६४ लाख विशेष अनुदान चालूतर्फ ७५ लाख, समपुरक अनुदान पूजीगततर्फ २ करोड ५ लाख २ हजार, राजस्व बाँडफाँड प्रदेशतर्फ ४३ लाख ५ हजार अनुमान गरिएको छ । 
शैल्यशिखर नगरपालिकाले चालूतर्फ ४६ करोड ४६ लाख ९३ हजार ५०६ रुपैयाँ तथा पूजीगततर्फ १४ करोड २७ लाख १० हजार ४ सय ९४ रुपैयाँ अनुमान गरेको उपप्रमुख खडायतले जानकारी दिइन् ।
दार्चुलाको मालिकार्जुन गाउँपालिकाले आगामी आर्थिक वर्षको लागि कुल ५७ करोड ९१ लाख ७४ हजार रुपैयाँको अनुमानित बजेट गाउँसभामा पेश गरेको छ । १२ औं गाउँसभामा आगामी वर्षको विभिन्न शिर्षकमार्फत आउने रकम गाउँमा सभामा पेश गरेका हुन् । गाउँपालिका उपाध्यक्ष कल्यानसिह धामीले नीति कार्यक्रम तथा बजेट पेश गरेका छन् ।
गाउँपालिकाले संघीय सरकारबाट वित्तिय समानीकरण अनुदानतर्फ १० करोड ६५ लाख, राजस्व बाँडफाँड ७ करोड ६९ लाख, सर्शत अनुदानतर्फ २४ करोड ३५ लाख ५९ हजार, सामाजिक सुरक्षातर्फ ७ करोड ९९ लाख ४० हजार र समपुरक अनुदानतर्फ २ करोड २० लाख गरी कुल ५२ करोड ८८ लाख ९९ हजार रुपैयाँ अनुमान गरिएको छ ।
यस्तै प्रदेश सरकारबाट वित्तिय समानीकरण अनुदानतर्फ ९८ लाख, विशेष अनुदान ७० लाख, राजस्व बाँडफाँड ९ लाख ७५ हजार, सर्शत अनुदान ७८ लाख ५० हजार, समपुरक अनुदान १६२ लाख गरी कुल ४ करोड १९ लाख ७५ हजार रुपैया अनुमान गरिएको छ । यस्तै पालिकाको आन्तरिक राजस्वतर्फ ३५ लाख, गत वर्षको अनुमानित मौज्दात ५० लाख बजेट अनुमान गरिएको गाउँपालिकाले जनाएको छ ।
मार्मा गाउँपालिकाले पनि आज नीति कार्यक्रम सार्वजनिक गरेको छ ।