रोम विधान अनुमोदनको माग गर्दै सरकारलाई ज्ञापनपत्र

अन्तर्राष्ट्रिय न्याय दिवस (जुलाई १७) को अवसरमा साउन २ गते अन्तर्राष्ट्रिय फौजदारी अदालतको रोम विधान अनुमोदन गर्न माग गर्दै दार्चुलामा अधिकारकर्मीहरुले हस्ताक्षर संकलन गरी प्रमुख जिल्ला अधिकारीमार्फत सरकारलाई ज्ञापनपत्र बुझाइएको छ । अन्तर्राष्ट्रिय फौजदारी अदालतको रोम विधान अनुमोदन गर्न माग गर्दै दार्चुलाका प्रमुख जिल्ला अधिकारी यज्ञराज जोशीमार्फत प्रधानमन्त्रीलाई ज्ञापनपत्र बुझाइएको हो ।
रोम विधान अनुमोदन गर्न सरकारसँग माग गर्दै बुझाइएको ज्ञापनपत्रमा अनौपचारिक क्षेत्र सेवा केन्द्र इन्सेक, गैरसरकारी संस्था सामुदायिक ग्रामीण विकास समाज नेपाल तथा पत्रकारहरुले हस्ताक्षर गरेका छन् । 
नेपालको मानव अधिकारको सम्मानका लागि रोम विधानको अनुमोदन गर्नु आवश्यक रहेको भन्दै ज्ञापन पत्र बुझाइएको इन्सेक दार्चुलाका प्रतिनिधि नरेन्द्रसिह कार्कीले बताए । 
रोम विधान अन्तर्गत गठन भएको अन्तर्राष्ट्रिय फौजदारी अदालतले अन्तर्राष्ट्रिय कानुनद्वारा परिभाषित युद्ध अपराध, आमनरसंहार र मानवता विरूद्धको अपराध जस्ता गम्भीर अपराधमा संलग्न हुने व्यक्तिहरूलाई जबाफदेही बनाउनुका साथै पीडितको न्याय सुनिश्चित गर्नेबारे ज्ञापनपत्रमा उल्लेख छ ।
अधिकारकर्मीहरूबाट प्राप्त पत्रलाई तत्कालै प्रधानमन्त्री तथा मन्त्री परिषद्को कार्यालयमा पठाउने उनले प्रतिबद्धता व्यक्त गरे ।